Kl. 09:29, 11.06.2008 Fjölburafæðingin um garð gengin!
Hún hafði það af sú litla að koma öllum krílunum í heiminn. Nú kúra 7 maríuerluungar í kotinu við fæðingardeildina og virðast una hag sínum vel, alltént er lystin næg. Auðvitað er erfitt að telja svona strá í heystakki en ekki er stætt á því að véfengja talningu alvanra höfðatöluljósmæðranna á FSÍ. Engum sögum fer af sængurgjöfum en víst er að nú er flugbrú með maðka og önnur kikvendi að hreiðrinu enda þarf að koma ungviðinu á legg - eða öllu heldur væng - sem fyrst.
Þessi myndarlega maríuerluhnáta hefur gert sér hreiður í einu af mörgum skotum á byggingu Fjórðungssjúkrahússins á Ísafirði. Þar virðist hún una hag sínum vel, enda veit hún sem er að hún er í góðum höndum þegar fyrstu goggarnir gægjast í heiminn. Hún þó ólíkt rólegri yfir þessu öllu en ljósmæðurnar sem bíða með öndina í hálsinum enda eru fjölburafæðingar ekki daglegt brauð á fæðingardeildinni.
Kl. 14:16, 13.05.2008 Opið á Tjörn á Þingeyri í sumar
Hjúkrunardeildin á Tjörn á Þingeyri verður ekki lokað tímabundið í sumar eins og gert hafði verið ráð fyrir. Stjórnendur Heilbrigðisstofnunarinnar Ísafjarðarbæ ákváðu þetta í morgun.
